Á nýársdag 2015 var Sigrún Huld Hrafnsdóttir sæmd riddarakrossi hinnar íslensku fálkaorðu fyrir afrek og framgöngu á vettvangi íþrótta fatlaðra. Sigrún Huld Hrafnsdóttir fæddist 12. janúar 1970, dóttir hjónanna Kristínar Erlingsdóttur og Hrafns Magnússonar. Hún ólst upp í Seljahverfinu og gekk í Öskjuhlíðarskóla til 18 ára aldurs. Í dag vinnur hún hjá Nóa Síríus og líkar það vel, hlaut nýlega viðurkenningu fyrir 25 ára starfsaldur þar.
Í nýlegu fréttabréfi frá Íþróttafélaginu Ösp segir:
Það er vitaskuld fréttnæmt að þroskahamlaður og einhverfur einstaklingur eins og Sigrún Huld skuli fá slíka viðurkenningu fyrst allra. Þar með er vonandi brotið blað í viðhorfum samfélagsins til þroskahamlaðra og einhverfra einstaklinga sem skarað hafa framúr í íþróttum og verið fyrirmynd annarra í svipuðum sporum.
Sigrún Huld var ein fremsta sundkona úr röðum fatlaðra. Hún hún hóf æfingar hjá Íþróttafélaginu Ösp árið 1983 og hætti keppni í lok árs 1996 eða eftir 13 ára sigursælan feril. Sigrún Huld var nær ósigrandi á sundmótum bæði hér innanlands og erlendis þegar hún keppti fyrir Íslands hönd.
Sigrún Huld var um árabil ein fremsta sundkona úr röðum fatlaðra. Hún hóf æfingar hjá Íþróttafélaginu Ösp árið 1983 og hætti keppni í lok árs 1996 eftir 13 ára sigursælan feril.
Bestum árangri náði Sigrún Huld á Ólympíumóti fatlaðra í Madrid á Spáni árið 1992 þegar hún vann til 9 gullverðlauna og 2 silfurverðlauna og setti um leið 4 heimsmet í einstaklingsgreinum og fjögur í boðsundum.
Sagt var að Sigrún Huld Hrafnsdóttir hefði unnið til svo margra gullverðlauna að mótshöldurum fannst varla taka því að taka íslenska fánann niður, nema ef vera skyldi vegna fánareglna og spurt var hvort það væri til styttri útgáfa af þjóðsöngnum.
Sigrún Huld skömmu eftir komuna til landsins frá Madrid með níu gullverðlaun og tvenn silfurverðlaun. Eftir Ólympíumótið í Madrid átti Sigrún Huld ennþá glæstan sundferil og setti til viðbótar nokkur heimsmet í keppnum sínum hér heima og erlendis. Hennar aðalgrein var bringusund og á hún enn Íslandsmet í 100 og 200 metra bringusundi.
Sigrún Huld var þrívegis valin íþróttamaður ársins hjá Íþróttasambandi fatlaðra, 1989, 1991 og 1994 og árið 1991 var hún útnefnd besti íþróttamaður þroskaheftra í heiminum af Alþjóðasamtökum þroskaheftra, INAS. Þá var hún valin íþróttamaður Reykjavíkur árið 1992. Einnig var hún valinn maður ársins hjá hlustendum Rásar 2 og Bylgjunnar á árinu 1992.
Óhætt er að fullyrða að Sigrún Huld hafi rutt brautina svo um munaði á Ólympíumótum fatlaðra með glæstum sigrum sínum í Madrid en síðan liðu heil tuttugu ár, þar til sundmaður úr röðum þroskahamlaðra, líka alin upp í Ösp, Jón Margeir Sverrisson, náði því að vinna gullverðlaun á sama vettvangi.
Hér má nálgast viðtal við Sigrúnu Huld sem tekið var við hana fyrir tímarit ÍF, Hvati, árið 2010.
Íþróttasamband fatlaðra óskar Sigrúnu Huld innilega til hamingju með riddarakross hinnar íslensku fálkaorðu.
Mynd 1/ www.forseti.is - Frá Bessastöðum á Nýársdag.
Mynd 2/ Sigrún Huld komin til Íslands frá Madrid árið 1992 drekkhlaðin verðlaunum.
