Jón Margeir Sverrisson fór hamförum í sundlauginni í London áðan þegar hann setti nýtt og glæsilegt heimsmet í 200m skriðsundi í flokki S14, flokki þroskahamlaðra. Jón synti á 1:59,62 mín. en þrír efstu menn syntu allir undir ríkjandi heimsmeti. Jón var annar eftir 50 metra á 27,66 sekúndum en var kominn í 1. sætið eftir 100 metra á 57,85 sekúndum. Enn var hann fyrstur eftir 150 metra á 1:28,56 mín og síðasti spretturinn tók hann 31,06 sek. og það dugði fyrir gullinu og nýju heimsmeti
Jón Margeir er 19 ára gamall og var í kvöld að vinna til fyrstu verðlauna Íslands á Ólympíumóti síðan árið 2004 þegar Kristín Rós Hákonardóttir og Jón Oddur Halldórsson fóru mikinn í sundi og frjálsum. Þá er ánægjulegt að greina frá því að heimsmetið hans er einnig Ólympíumótsmet og mun það standa næstu fjögur árin eða þangað til í Rió 2016!
Sund Jóns Margeirs í heild sinni
Jón Margeir tekur á móti gullinu
Fyrsta viðtalið við Jón eftir sigursundið
Mynd/ Jón Margeir bendir áhorfendum á hvaðan hann kemur með því að veifa sundhettunni sinni.
