Á nýafstaðinni helgi setti Jón Margeir Sverrisson sundmaður úr Ösp/Fjölni sex Íslandsmet og eitt heimsmet á Opna þýska meistaramótinu. Jón er í fantaformi um þessar mundir en er væntanlegur til landsins í kvöld kringum miðnætti.
Yfirlit yfir árangur Jóns um helgina:
Fimmtudagur 28. apríl:
Nýtt og glæsilegt Íslandsmet í 200m. skriðsundi í undanrásum. Jón synti á 2.05,98mín. sem er fjórði besti tíminn í heiminum í flokki S14, flokki þroskahamlaðra. Í úrslitum bætti Jón Íslandsmetið á nýjan leik er hann synti á tímanum 2.05,92mín.
Föstudagur 29. apríl:
Heimsmet! Jón setti nýtt heimsmet í flokknum sínum í 800m. skriðsundi á tímanum 9.07,25mín. Ekki var um undanrásir að ræða heldur var aðeins synt í úrslitum í 800m. skriðsundi en þessi grein er ekki ein þeirra sem flokki S14 verður boðið upp á í London á Ólympíumóti fatlaðra 2012. Þá var millitími Jóns í þessu sundi í 400m. skriðsundi nýtt Íslandsmet en sá tími var 4.32,38mín.
Laugardagur 30. apríl:
Jón bætti sinn persónulega árangur í 100m. bringusundi og synti á tímanum 1.18,47mín. en Íslandsmetið á Gunnar Örn Ólafsson sem er 1.17,72mín.
Sunnudagur 1. maí:
Jón setti nýtt Íslandsmet í 100m. skriðsundi í undanrásum og í úrslitum bætti hann tímann sinn að nýju og því féllu alls tvö Íslandsmet þennan daginn. Tími hans í úrslitum var 57,75 sek. Þá var Jón við sinn besta tíma í baksundi er hann synti á 1.12,52mín. en Íslandsmetið er í eigu Gunnars Arnar Ólafssonar og er 1.08,14mín.
Jón setti því alls sex ný Íslandsmet í Þýskalandi og eitt heimsmet. Heimasíða ÍF náði stuttu tali af Sverri Gíslasyni föður Jóns Margeirs en þeir feðgar voru saman á mótinu. Sverrir sagði að mjög góð helgi væri að baki og var eins og gefur að skilja allur hinn kátasti. Þeir eru væntanlegir til landsins á miðnætti í kvöld.
Til hamingju Jón Margeir!
