Eini íslenski keppandinn sem stakk sér til sunds á HM fatlaðra í morgun var Anna Kristín Jensdóttir en hún tók þátt í 100 m bringusundi SB5 (flokki hreyfihamlaðra). Anna Kristín hafnaði í 9. sæti á nýju Íslandsmeti, tímanum 2:22.60 mín og var örfáum sekúndubrotum frá því að tryggja sér sæti í úrslitum.
Á morgun keppa þau Eyþór Þrastarson í 100 m skriðsundi flokki S11 (flokki blindra), Sonja Sigurðardóttir i 50 m baksundi flokki S5 (flokki hreyfihamlaðra) og Jón Margeir Sverrison, Rangar Ingi Magnússon, Aníta Ósk Hrafnsdóttir og Kolbrún Alda Stefánsdóttir í 100 m baksundi í flokki S14 (flokki þroskahamlaðra).
Sund fatlaðra:
Í sundi fatlaðra, líkt og í sundi ófatlaðra, er keppt í fimm sundgreinum auk boðsunds í mismunandi vegalengdum. Þá er í flestum flokkum í ; skriðsundi keppt í 50, 100, 200 og 400 m, í bringusundi í 50, 100 og 200 m, í baksundi 50, 100 og 200 m, í flugsundi 50, 100 og 200 m flugsundi, í fjórsundi í 150 og 200 mauk 4 x 50, 4 x 100, 4 x 200 og 4 x 400 m boðsunds í skriðsundi og fjórsundi.
Í sundi fatlaðra er keppnisreglum FINA (Alþjóðasundsambandsins) fylgt að mestu með þeim undantekningum að t.a.m. er leyft að banka í höfuð blinds sundmanns er hann nálgast bakkann, einhentur maður getur aldrei sett báðar hendur í bakkann og í flokkum þeirra er mest eru fatlaðir er leyfilegt að “starta” ofan í lauginni.
Ljósmynd/ Anna Kristín lengst til vinstri ásamt félögum úr íslenska hópnum.
