Þrjú ný Íslandsmet í úrslitum hjá Má og Róberti


Sundmennirnir Már Gunnarsson, ÍRB, og Róbert Ísak Jónsson, Fjörður/SH, settu báðir Íslandsmet í úrslitum á Evrópumeistaramóti IPC í dag. Már bætti sitt eigið met í 100m flugsundi og Róbert bætti sitt eigið met í 100m baksundi.

Róbert Ísak hafnaði í 7. sæti í úrslitum í 100m baksundi S14 og bætti Íslandsmetið á nýjan leik er hann kom í bakka á 1:04.76mín í Madeira. Róbert bætti því Íslandsmetið sem hann setti í undarásunum í morgun!

Már Gunnarsson hafnaði í 4. sæti í úrslitum í 100m flugsundi S11 og bætti sitt eigið Íslandsmet þegar hann kom í bakka á 1:11.11 mín. en fyrra metið var 1:11.12 mín. Sundið bauð upp á tvö met því millitími Más í 50m var einnig Íslandsmet en hann var 32,33 sek.


Mynd/ Már og Róbert settu báðir Íslandsmet í úrslitum kvöldsins.